|
Dejvid Grejem Bllant u lind në vitin 1953 në Saseks, Britani e Madhe.
Momentalisht është ambasador i Mbretërisë së Bashkuar dhe Irlandës Veriore në Kroaci.
Në vendin e tij të parë të punës në Ministrinë e Punëve të Jashtme (FCO) është marr me marrëdhëniet midis Britanisë së Madhe dhe Republikës së Irlandës. Pas kësaj ka punuar në ambasadën e Vjenës (1979-1983) dhe Pekinit (1983-1987), ku ishte anëtar i grupit britanik negociator për Hong Kong-un, kurse më vonë punoi në përgatitjet e vizitës shtetërore të Mbretëreshës Elizabeta II në Kinë në vitin 1986. Gjatë viteve 1987-1989 punoi në Londër në çështjet e politikës ushtarake dhe më vonë si udhëheqës i departamentit për Francën dhe shtetet e Beneluksit e më vonë në Ambasadën Britanike në Kanberë (1989-1994) si udhëheqës i seksionit për çështje politike. Kur u kthye në Londër punoi si drejtor i Monitoring Service Review të BBC-së, kurse pas kësaj ishte në krye të FCO Management Consultancy Team. Pastaj punoi si zëvendës-ambasador në Osllo (1997-2001) dhe si zëvendës i guvernatorit të Gjibraltarit (2002-2005). Detyrën e shefit të Zyrës Britanike në Prishtinë si dhe Ambasadorit të parë të Britanisë së Madhe në Kosovë e mori në janar të vitit 2006. Deri në prill 2008, kur kalon në një detyrë të re, ishte fuqishëm i kyçur në negociatat për statusin e Kosovës që kulmuan me aprovimin e Deklaratës për pavarësinë e Kosovës në shkurt 2008.
Vijoi mësimet në universitetin e Mançesterit ku edhe diplomoi në drejtimin e gjeografisë. Po ashtu ka studiuar gjuhën frenge dhe gjermane si lëndë sekondare.
Para se të punësohej në Ministrinë e Punëve të Jashtme (FCO) në vitin 1978, punoi për një kohë të shkurtër edhe si arsimtar.
I pëlqen muzika korale dhe sporti. Është i martuar me Geirid, shtetase norvegjeze, dhe ka tre fëmijë.
|
